60

1082 Madde Hazır ve gaibin hane-i müşterekde hisseleri yekdiğerinden müfrez ise hazır olan kimse gaibin hissesinde sakin olamaz.
Lakin boş durmakla harab olmasından havf olunur ise hakim ol hisse-i müfrezeyi icâr ile ücretini gaib için hıfz ve tevkif eyler.

1083 Madde Muhayeat ancak ba'de'l-husûme cari ve muteber olur.
Binaenaleyh bir müşterek hanede sahiplerinden birisi diğerinin hissesi için ücret vermeksizin bir müddet müstakillen sakin oldukda diğeri ya ol müddet için benim hissemin ücretini ver veyahut ben dahi o kadar müddet sakin olurum diyemeyip ancak dilerse hane kabil-i kısmet olduğu takdirde taksim ve dilerse andan sonra muteber olmak üzere muhayeat ettirir.
Fakat müşterek hane sahiplerinden biri gaib olup da diğeri madde-i anifede beyan olunduğu üzere bir müddet anda sakin olsa gaib dahi geldikde o kadar müddet anda sakin olabilir.

1084 Madde Hane-i müştereki sahiplerinden hazır olan kimse icâr ve ücretinden kendi hissesini alıp gaibin hissesini hıfz ve tevkif etse caiz olur.
Ve gaib geldikde hissesini andan alır.

1085 Madde Müşterek arazi sahiplerinden biri gaib oldukda ziraatin noksan-ı arzı mucib olmayıp arza nafi olacağı malum olur ise hazır olan müşariki ol arazinin tamamını ziraat edebilir.
Ve ne kadar müddet ziraat ederse gaib dahi geldikde ol kadar ol araziyi ziraat eyler.
Ve eğer ziraatin noksan-ı arzı mucib ve terki nafi ve arzın kuvvetleşmesini müeddi olacağı malum olursa ol arazinin ziraatine gaibin delâleten izni bulunmaz.
Binaenaleyh hazır olan müşariki ol araziden yalnız kendi hissesi miktarını meselâ münasafaten müşterek ise nısfını ziraat eyler.
Ve sene-i âtiyede tekrar ziraat edecek olursa yine ol nısfı ziraat edip yoksa bir tarafını ve diğer sene diğer tarafını ziraat edemez.
Ve eğer ol arazinin tamamını ziraat ederse gaib geldikde ana noksan-ı arzdan hissesini tazmin ettirebilir.

(Tafsilat)