64

Ve bu hâlde medyunun zimmetinde kalan beş yüz guruş yine ikisi beyninde müşterek olur.

1103 Madde
Dâin-i müşâriklerden biri deyn-i müşterekden bir şey kabz etmeyip fakat hissesine bedel medyundan bir meta‘ iştirâ eylese dâin-i dîger ol meta‘da müşârik olmaz. Fakat meta‘ın semeninden kendi hissesini aña tazmîn ettirebilir. Ve eğer iştirâk üzere ittifâk ederlerse ol meta‘ beynlerinde müşterek olur.

1104 Madde
Dâin-i müşâriklerden biri deyn-i müşterekdeki hakkından meselâ şu kadar top bezi üzerine medyun ile sulh olarak o kadar top bezi kabz etse muhayyer olur. Dilerse aldığı bezlerden müşârikinin hissesine isâbet eden mikdârı aña teslîm eder. Ve dilerse vaz geçmiş olduğu hakkından müşârikinin hissesine isâbet eden mikdâr meblağı aña verir.

1105 Madde
Dâinlerden biri ber-vech-i bâlâ gerek deyn-i müşterekden bir mikdârını yâ tamâmını kabz etsin ve gerek kendi hissesine bedel mal iştirâ eylesin ve gerek alacağı mukâbilinde bir mal üzerine medyun ile sulh olsun dâin-i dîger her sûretde muhayyer olur. Dilerse müşârikinin bu muâmelesini mücîz olur ve mevâdd-ı ânifede beyân olunduğu üzere hissesini andan alır. Ve dilerse mücîz olmayıp hissesini medyundan ister. Ve eğer medyunda alacağı batarsa dâin-i kâbıza rücû‘ eder. Mukaddemâ mücîz olmaması mâni‘-i rücû‘ olmaz.

1106 Madde
Dâinlerden biri deyn-i müşterekde olan hissesini medyundan alıp da yedinde kazârâ telef olsa müşârikinin bu makbûzda olan hissesini zâmin olmaz. Fakat kendisi hissesini istîfâ etmiş olur. Medyunda kalan alacak dahi müşârikine âid olur.

1107 Madde
Dâinlerden biri deyn-i müşterekdeki hissesine bedel medyunu
( Ücret )