65

Ücret ile istihdam eylese diğeri ücretten kendi hissesine isabet eden miktarı ona tazmin ettirebilir.

1108 Madde — Dâin-i müştereklerden biri kendi hissesi için medyundan rehin alıp da yedinde rehin telef olsa müşariki ondan hissesine düşen miktarı tazmin ettirebilir.
Meselâ münasafaten müşterek olan deynin miktarı bin guruş olup da dâinlerden biri kendi hissesi için beş yüz guruşluk bir rehin alsa ve yedinde bu rehin telef olsa deyn-i müşterekin nısfı sakıt olacağından dâin-i diğer kendi hissesine aid olan iki yüz elli guruşu ona tazmin ettirebilir.

1109 Madde — Dâinlerden biri deyn-i müşterekdeki hissesi için medyundan kefil aldığı veyahud hissesini bir kimesne üzerine havale ettirdiği surette kefilden yâhud muhal-un-aleyhden ahz ü kabz eylediği meblağda dâin-i diğer ona müşarik olur.

1110 Madde — Dâinlerden biri deyn-i müşterekdeki hissesini medyuna hibe yâhud medyunun zimmetini ondan ibra eylese hibesi yâ ibrası sahih olur ve bundan dolayı müşarikinin hissesini zâmin olmaz.

1111 Madde — Bir deyn-i müşterekde müşarik olan dâinlerden biri medyunun malını itlaf edip de damânen ânın alacağına takas olsa müşariki ondan hissesini alabilir.
Fakat deyn-i müşterekin sübutundan mukaddem olan bir sebeb ile dâinlerden birinin medyuna deyni olup da deyn-i müşterekdeki hissesiyle takas olsa müşariki ona hissesini tazmin ettiremez.

1112 Madde — Dâinlerden biri diğerinin izni olmaksızın deyn-i müştereki te'cil ve te'hir edemez.

( Lâhika )

1113 Madde — Bir kimesne iki kişiye bir mal satsa her birinden hissesini başka başka mutalebe eder müşteriler yekdiğere kefil olmadıkça birinin borcu diğerinden mutalebe olunamaz.