64

ve dilerse mikdar-ı noksaniyle müşarikine rücu' eyler
1126 Madde Kısmet-i fuzuli kavlen yahud fi'len icazete mevkuf olur
mesela biri mal-ı müştereki hodbehod taksim etse caiz ve nafiz olmaz
fakat sahibleri pek a'la deyu kavlen icazet verse yahud hisse-i müfrezelerinde
tasarruf-ı emlak ile yani bey' ve icar gibi temellük levazımından olan bir vechle
tasarruf etseler kısmet sahih ve nafiz olur
1127 Madde Kısmetin adilane olması yani hisseler istihkaklarına göre
ta'dil olunarak birisinde noksan-ı fahiş olmaması lazımdır
binaenaleyh kısmetde gabn-ı fahiş davası istima' olunur
fakat maksumunleh olanlar istifa-yı hak eylediklerini ikrar etdikden sonra gabn-ı
fahiş davası ederlerse istima' olunmaz
1128 Madde Kısmet-i rızada mütakasıminden her birinin rızası şartdır
binaenaleyh birisi gaib olsa kısmet-i rıza sahih olmaz
ve içlerinde sagir var ise velisi yahud vasisi anın makamına kaim olur
ve eğer velisi yahud vasisi yok ise hakimin emrine mevkuf olur
ve hakim tarafından bir vasi nasb olunarak anın marifetiyle taksim olunur
1129 Madde Kısmet-i kazada taleb şartdır
hissedarların birisi tarafından olsun taleb vaki' olmadıkça hakim tarafından
cebra kısmet sahih olmaz
1130 Madde Hissedarlardan ba'zısı kısmet isteyib de ba'zısı imtina'
etdiği takdirde fasl-ı salis ve rabi'de beyan olunacağı vechle mal-ı müşterek
eğer kabil-i kısmet ise hakim anı cebra taksim eyler
değil ise taksim etmez
1131 Madde Kabil-i kısmet taksimi salih olan mal-ı müşterekdir
şöyle ki ol maldan maksud olan menfaat kısmet ile fevt olmaya
* Fasl-ı Salis *
( Kısmet-i cem' beyanındadır )
1132 Madde Müttehidü'l-cins olan a'yan-ı müşterekede kısmet-i kaza cari olur
yani müşariklerden yalnız ba'zısının talebi üzerine hakim anları hükmen taksim eyler