76

Ve tasrîh olunmadıkça dâhil olmayıp anlar kemâ-kân müşterek olarak kalır hîn-i taksîmde gerek cemî‘ hukûkuyla gibi bir ta‘bîr-i umûmî îrâd olunsun ve gerek olunmasın.

1165 Madde Maksûmun arâzî-i mücâverede olan hakk-ı tarîk ve mesîli her hâlde dâhil-i kısmet olur. Ya‘nî kimin hissesinde vâki‘ olursa anın hukûkundan olur hîn-i taksîmde gerek cemî‘ hukûkuyla denilsin ve gerek denilmesin.

1166 Madde Hîn-i kısmetde bir hissenin dîger hissede tarîki yâhud mesîli olması şart edilirse ol şarta ri‘âyet edilir.

1167 Madde Bir hissenin dîger hissede tarîki olup da hîn-i kısmetde ibkâsı şart edilmemiş ise başka tarafa sarf ve tahvîli kâbil olduğu takdîrde sarf ve tahvîl olunur hîn-i kısmetde gerek cemî‘ hukûkuyla denilsin ve gerek denilmesin. Ammâ tarîkın başka tarafa sarf ve tahvîli kâbil olmadığı takdîrde bakılır eger hîn-i kısmetde cemî‘ hukûkuyla denilmiş ise tarîk dâhil-i kısmet olarak hâli üzere ibkâ olunur. Ve eger cemî‘ hukûkuyla gibi bir ta‘bîr-i umûmî ilâve olunmamış ise kısmet fesholunur. Bu husûsda mesîl dahi aynıyla tarîk gibidir.

1168 Madde İki kişi beyninde müşterek bir hânede dîger kimsenin tarîki olup da hâne sâhibleri ol hâneği taksîm edecek olduklarında tarîk sâhibi mâni‘ olamaz. Fakat anlar dahi hâneği taksîm etdiklerinde tarîki hâli üzere terk ederler ve üçü bi’l-ittifâk hâne ile berâber tarîki dahi satdıkları takdîrde eger tarîk üçünün beyninde müşterek ise semen üçünün beyninde taksîm olunur. Ve eger tarîkın rakbesi konak sâhiblerinin olup da ol kimsenin yalnız hakk-ı mürûru var ise her biri hakkını alır. Şöyle ki arsa bir kere hakk-ı mürûr ile ve bir kere hakk-ı mürûrsuz takvîm olunup iki kıymet beynindeki fazla hakk-ı mürûr sâhibinin olur ve bâkîsi hâne sâhiblerine âid olur. Mesîl dahi tarîk gibidir.

( Ya‘nî )