78

Fasl-ı Tâsi‘

( Muhâye’e beyânındadır )

1174 Madde Muhâye’e kısmet-i menâfi‘den ibâretdir.

1175 Madde Misliyâtda muhâye’e cârî olmaz.
Muhâye’e ol kıyemiyâtda cârî olur ki aynları bâkî olarak anlarla intifâ‘ mümkin ola.

1176 Madde Muhâye’e iki nev‘dir.
Nev‘-i evvel zamânen muhâye’edir.
Nitekim iki kişi beyninde müşterek arâzîyi bir sene biri ve dîger sene dîgeri zirâ‘at etmek ve bir müşterek konak sâhiblerinden her biri bi’l-münâvebe ol konakda bir sene oturmak üzere muhâye’eleri gibi.
Nev‘-i sânî mekânen muhâye’edir.
Nitekim iki kişi beyninde müşterek olan arâzînin yarısını biri ve dîger yarısını dîgeri zirâ‘at etmek ve müşterek konağın bir tarafında biri ve dîger tarafında dîgeri yâhud üst katında biri ve alt katında dîgeri ve müşterek iki hânenin birisinde biri ve dîgerinde dîgeri oturmak üzere muhâye’eleri gibi.

1177 Madde Bir müşterek hayvânı sâhibleri bi’l-münâvebe kullanmak üzere muhâye’e câiz olduğu gibi iki müşterek hayvândan birini biri ve dîgerini dîgeri kullanmak üzere muhâye’e dahi câiz olur.

1178 Madde Zamânen muhâye’e bir nev‘ mübâdeledir.
Şöyle ki bir hissedârın kendi nöbetindeki hissa-i menfa‘ati dîger hissedârın nöbetindeki hissa-i menfa‘atiyle mübâdele edilmiş olur.
Bu cihetle zamânen muhâye’e icâre hükmündedir.
Binâen-alâ-zâlik zamânen muhâye’ede şu kadar gün yâhud şu kadar ay gibi bir müddet zikr ve ta‘yîn olunmak lâzımdır.

1179 Madde Mekânen muhâye’e bir nev‘ ifrâzdır.
Şöyle ki iki hissedârın meselâ bir müşterek konakda olan menfa‘atleri şâyi‘ ya‘nî ol konağın her cüz’üne şâmil iken muhâye’e ile birinin menfa‘ati
( Evvel )