80

Nöbetinde akar-ı müştereki ve mekânen muhâye’eden soñra kendi hissesine isabet eden kıt’ayı bizzat istimal edebildiği gibi âhara icar ile kendisi içün ücretini ahz edebilir.

1186 Madde İbtida menafi’ üzerine muhâye’e olunduktan soñra hissedarlar kendi nöbetlerini icar edip de biriniñ nöbetinde galle ziyade olsa diğer hissedar ol ziyadede müşarik olmaz.
Amma ibtida istiglal etmek üzere meselâ bir müşterek haneniñ kirasını bir ay biri ve bir ay diğeri almak üzere muhâye’e etseler fazlası müşterek olur.
Fakat iki haneden biriniñ gallesini biri ve diğeriniñ gallesini diğeri almak üzere muhâye’e ettiklerinde bir haneniñ gallesi ziyade olsa diğer hissedar aña müşarik olmaz.

1187 Madde A’yân üzerine muhâye’e caiz olmaz.
Meselâ müşterek eşcarıñ meyveleri ve müşterek hayvanlarıñ südü ve yükü a’yândan olmağla eşcar-ı müşterekeden bir mikdarınıñ meyvesini müşariklerden biri ve diğer mikdarınıñ meyvesini diğeri devşirmek ve müşterek koyunlarıñ bir sürüsünüñ südünü ve yükünü biri ve diğer bir sürüsünüñ südünü ve yükünü diğeri almak üzere muhâye’e sahih olmaz.

1188 Madde Hissedarlar bittarazi beynlerinde muhâye’e ettiklerinde ba’dehu yalñız birisi anı feshedebilirse de biri kendi nöbetini âhara icar etmiş ise müddet-i icare munkazi olmadıkça diğeri muhâye’eyi feshedemez.

1189 Madde Hükm-i hâkim ile icra olunan muhâye’eyi hissedarlardan yalñız biri feshedemez ise de hepsi bittarazi feshedebilir.

1190 Madde Hissedarlardan biri hissesini satmak yahud taksim eylemek murad ettikde muhâye’eyi feshedebilir.
Amma mücerred mal-ı müştereki eski haline iade etmek üzere bilâ-sebeb muhâye’eyi feshedecek olsa hâkim aña müsaade etmez.

1191 Madde Hissedarlardan biriniñ yahud hepsiniñ vefatiyle muhâye’e bâtıl olmaz.

( Bab-ı Sâlis )