88

Mücerred sâhibinin izniyle bir müddet mürûr etdikden sonra sâhibi dilerse anı mürûrdan men' edebilir.

١٢٢٧ Madde Birinin arsasından bir memer-i muayyende hakk-ı mürûru olan kimsenin izniyle sâhib-i arsa ol memer üzerine binâ ihdâs eylese ol kimsenin hakk-ı mürûru sâkıt olub sâhib-i arsa ile artık muhâsamaya hakkı kalmaz.

( ٥١ ) maddeye bak

١٢٢٨ Madde Birinin arsasından dîger kimsenin harkı yâhud su yolu bi-hakkın cârî ola-gelirken arsa sâhibi fîmâ-ba'd icrâ etdirmem deyü men' edemez.

Ve bunlar ıslâh ve ta'mîre muhtâc oldukda mümkün ise sâhibi mecrâya duhûl ile bunları ıslâh ve ta'mîr eder.

Ammâ ol arsaya girmedikçe ta'mîrleri mümkün olmadığı hâlde sâhibi arsasına girmekliğe izin vermez ise hâkim tarafından kendisine yâ arsaya girmek üzere izin ver yâhud sen ta'mîr et deyü cebr olunur.

١٢٢٩ Madde Bir hânenin yağmur suları ez-kadîm komşunun hânesine akmakda olduğu hâlde komşusu bundan sonra akıtmam deyü men' edemez.

١٢٣٠ Madde Bir tarîkde olan hânelerin damlaları ez-kadîm ol tarîka munsab ve oradan alt tarafında vâki' bir arsa içinden cârî ola-gelirken arsa sâhibi arsasındaki mesîl-i kadîmi sedd edemez.

Sedd ederse hâkim tarafından seddi ref' ile vaz'-ı kadîme ircâ' olunur.

١٢٣١ Madde Kimse muhdes odasının damlasını âharın hânesine akıtamaz.

١٢٣٢ Madde Bir hânede hakk-ı mesîli olan kârîzi hâne sâhibi satar ise müşterisi kemâ-fi's-sâbık akıtmakdan men' edemez.

١٢٣٣ Madde Bir hâneden bi-hakkın cârî olan kârîz dolub yâhud yarılıb da hâne sâhibine zarar-ı fâhiş olsa kârîzin sâhibi bu zararı def'e mecbûr olur.

( Bâb-ı Râbi' )