96

1285 Madde Suyu yeryüzünde cari olan kanatın harimi gözler gibi her taraftan beş yüz arşındır.

1286 Madde Kuyuların harimi sahiblerinin mülküdür. Başkası anda bir vechle tasarruf edemez. Ve bir kimse diğerinin hariminde kuyu kazsa kapattırılır. Menbaların ve nehirlerin ve kanatların harimleri dahi bu vech üzeredir.

1287 Madde Bir kuyunun harimi kurbunda diğeri izn-i sultanî ile bir kuyu hafr etse sair cihetlerden bu kuyunun dahi kırkar arşın harimi olur. Amma evvelki kuyunun cihetinde anın harimine tecavüz edemez.

1288 Madde Bir kuyunun harimi haricinde bir kimesne kuyu kazıp da evvelki kuyunun suyu bu kuyuya gitse bir şey lazım gelmez. Nitekim bir kimesne diğerin dükkanı yanında dükkan açıp da evvelki dükkanın ahz ü itası kâsid olsa ikinci dükkan sedd olunamaz.

1289 Madde Arazi-i mevatda izn-i sultanî ile gars olunan ağacın harimi her taraftan beşer arşındır. Bu mesafe derununda başkası ağaç gars edemez.

1290 Madde Diğerin arsası içinde cereyan eden harkın iki tarafından suyu tutacak kadar kenarları hark sahibinindir. Ve iki tarafından kenarları mürtefi ise bu mürtefi yerler dahi kezalik hark sahibinindir. Ve eğer kenarları mürtefi olmayıp da üzerlerinde gerek arsa sahibinin ve gerek hark sahibinin mağrus ağaçları olmak gibi birinin zü'l-yed olduğuna dair bir delil dahi bulunmaz ise o halde bu yerler arsa sahibinindir. Fakat hark sahibi dahi harkını ayıklayacağı vakit çamurunu iki tarafa tarh ve ilka etmeğe hakkı vardır.

1291 Madde Bir kimsenin kendi mülkünde hafr eylediği kuyunun harimi yoktur. Komşusu dahi anın yanında ve kendi mülkünde diğer bir kuyu hafr edebilir. Ve evvel kimse benim kuyumun suyunu cezb eder deyu komşusunun kuyu hafr etmesine mani olamaz.

(Fasıl)