454

( Yedinci Fasıl )

( Cemiyet-i Umumiye’nin sûret-i teşkîline dâirdir )

On beşinci mâdde — Cemiyet-i Umumiye Şehremini riyâsetinde olmak üzere mecâlis-i belediye reislerinden ve mecâlis-i belediye a’zâsı kendi içlerinden intihâb edecekleri üçer a’zâdan terkîb olunur.

On altıncı mâdde — Cemiyet-i Umumiye her altı ayda Şehremaneti’nin da’vetiyle ictimâ’ edip nihâyet bir ay müddet devâm eyler.

On yedinci mâdde — A’zânın sülüsânı mevcûd olmadıkça bir mâdde üzerine karâr verilemez. Ma’amâfîh iki def’a da’vet olunarak a’zânın adedi derece-i matlûbeye gelmediği hâlde üçüncü def’a a’zâ-yı mevcûdenin re’y ve karârı makbûl olur.

On sekizinci mâdde — Bir mâddenin müzâkeresinde ârâ mütesâvi veyâ ikiye münkasım oldukda reisin ve hâzır bulunmadığı hâlde reis-i sânînin re’yi ne tarafda bulunur ise ol tarafda ekseriyet-i ârâ hâsıl olur.

On dokuzuncu mâdde — Cemiyet-i Umumiye ekseriyet-i ârâ ile a’zâsından iki reis-i sânî intihâb edip reis-i evvel bulunmadığı vakit bunlardan intihâbda el-ziyâde re’y kazanmış olan zât reisin vekâletini îfâ ve bu Cemiyet-i Umumiye’nin kâtibi riyâset tarafından ta’yîn kılınır.

( Sekizinci Fasıl )

( Cemiyet-i Umumiye’nin vezâifini beyânındadır )

Yirminci mâdde — Cemiyet-i Umumiye’de müzâkere olunan mesâlih ekseriyet-i ârâ ile karârgîr olur.

Yirmi birinci mâdde — Mecâlis-i belediyenin ve Şehremaneti’nin bütçelerini ve vâridât-ı seneviyelerinin sûret-i sarfını ve ahvâl-i umûmiye-i mâliyelerini mübeyyin defterlerini ba’de’t-tedkîk mevki’-i icrâya konmasına karâr verir.

Yirmi ikinci mâdde — Devâir-i belediyenin me’zûn olduğu mikdardan ziyâde ale’l-itlâk istikrâz akdi Cemiyet-i Umumiye’nin re’yine ve irâde-i seniyye-i şeref-sudûruna muhtâcdır.

Yirmi üçüncü mâdde — Tevsî’-i küşâd-ı turuk ve ahâlinin tenezzühü maksadıyla bahçe ve meydanlar...