58

۱۰۷۱ madde: Bir mülk-i müşterekde hissedarlardan biri diğerinin izniyle müstakillen tasarruf edebilir. Fakat ol hissedara muzır olacak vechile tasarrufu caiz olmaz.

۱۰۷۲ madde: Hissedarlardan biri âhara hisseni bana sat veyahut benim hissemi iştira et deyu cebredemez. Fakat beynlerinde müşterek olan mülk eğer kabil-i kısmet olub da müşariki dahi gaib değil ise taksim ve kabil-i kısmet değil ise muhayâ'e ettirebilir. Nitekim tafsilatı bab-ı sanide gelir.

۱۰۷۳ madde: Şirket-i mülk ile müşterek olan emvalin hasılatı sahibleri beyninde hisselerine göre taksim olunur. Binaenaleyh bir müşterek hayvanın südünden veyahut yavrularından müşariklerin birine hissesinden fazla bir şey şart edilse sahih olmaz.

۱۰۷۴ madde: Yavrular mülkiyetde analarına tabidir. Mesela birinin atı diğerinin kısrağını aşmakla hasıl olan yavrusu kısrak sahibinindir. Kezalik birinin erkek ve diğerinin dişi güvercinleri olsa bunlardan hasıl olan yavrular dişi güvercin sahiblerinindir.

۱۰۷۵ madde: Şirket-i mülkde müşariklerden her biri diğerinin hissesinde ecnebidir. Birisi diğerinin vekili değildir. Binaenaleyh birinin izni olmadıkça diğeri onun hissesinde tasarruf edemez. Fakat müşterek hane süknada ve duhul ve huruç gibi tevabi-i süknadan olan ahvalde sahiblerinden her birinin alel-vechi'l-kemal mülk-i mahsusu olmak üzere itibar olunur. Mesela bir müşterek bargiri sahiblerinden biri diğerinin izni olmaksızın iare veya icare edib de bargir müsteir veya müstecir yedinde telef olsa diğeri ana hissesini tazmin ettirebilir. Kezalik birisi bila-izin müşterek bargire binib veyahut yük yükledib de giderken bargir telef olsa diğerinin hissesini zamin olur.

(Ve keza)