63

Ve eğer her biri kendü hayvanına şu kadar guruş deyu tesmiye-i semen eylese her biri başka başka alacaklı olup hayvanların mecmu-ı esmanı deyn-i müşterek olmaz. Kezalik iki kişi bir kimesneye başka başka birer mal satsalar mebi‘lerin esmanı deyn-i müşterek olmayıp her biri başka başka alacaklı olur.

1097 Madde İki kişi kefaletleri hasebiyle bir kimesnenin borcunu te’diye etdiklerinde eğer beynlerinde müşterek olan maldan vermişler ise mekfulün-anh’a olan alacakları deyn-i müşterek olur.

1098 Madde Bir kimse şu kadar guruş deyni eda etmek üzere iki kişiye emir edip de anlar dahi te’diye etdiklerinde eğer beynlerindeki mal-ı müşterekden vermişler ise ol kimsede olan alacakları bir deyn-i müşterek olur. Ve eğer verdikleri akçe beynlerinde müşterek olmayıp da her birinin hissesi hakikaten mütemeyyiz ise mücerred birlikde eda etmiş olmalarıyla ol kimsede olan alacakları deyn-i müşterek olmaz.

1099 Madde Deyn-i müşterek değil ise dâinlerden her biri alacağını medyundan başka başka taleb ve istifa eyler. Ve her birisi her ne kabz ederse kendi alacağına mahsub eder. Dâin-i diğer andan hisse alamaz.

1100 Madde Deyn-i müşterek ise dâinlerden her biri kendi hissesini medyundan taleb edebilir. Ve birinin gıyabında dâin-i diğer hâkime müracaat ile hissesini medyundan taleb etdikde vermesi içün hâkim tarafından emir olunur.

1101 Madde Deyn-i müşterekden dâinlerin biri her ne kabz ederse diğeriyle beynlerinde müşterek olur ve müşariki andan hissesini alır. Kâbız anı yalnız kendi hissesine mahsub edemez.

1102 Madde Dâinlerinden biri deyn-i müşterekden hissesini alıp da sarf ve istihlak etse müşariki ana hissesini tazmin ettirebilir. Meselâ iki kişi beyninde münasafaten müşterek olan bin guruş alacakdan birisi hissesi olan beş yüz guruşu medyundan ahz ve kabz ile sarf ve istihlak eylese müşariki olan dâin-i diğer ana iki yüz elli guruşunu tazmin ettirebilir.